SIMBA wamepania na wamesisitiza wanakwenda Singida leo Alhamisi wakiwa na uhakika wa kutangaza ubingwa wa Ligi Kuu Bara huko, lakini benchi la ufundi na wachezaji wa Singida United wamesikia tambo hizo na kuwaambia hakuna kitu kama hicho. Singida watacheza na Simba Jumamosi kwenye Uwanja wa Namfua, mchezo ambao endapo Simba yenye pointi 65 itashinda, moja kwa moja itakuwa imetangaza ubingwa kutokana na kufikisha pointi 68 ambazo hazitafikiwa na timu nyingine yoyote. Yanga ambayo ina pointi 49 ndiyo timu pekee yenye nafasi ambayo kama itashinda mechi zake zote sita ilizobakiwa nazo itafikisha 67 ambazo mpaka sasa Simba bado hawajazifikia. Kocha Mkuu wa Singida United, Mholanzi Hans Pluijm, amesema: “Tutapambana na tutashinda, hatutaki kuwaangusha mashabiki wetu kwa kufungwa na Simba hapa nyumbani. Walitufunga mabao 4-0 Dar es Salaam na si hapa, hatutawapa nafasi hiyo.” Kwa upande wa beki wa Singida United, Miraji Adam alisema: “Simba waache maneno wanatamba hivyo kwani sisi tutakuwa tumesimama tu. Wasitarajie wepesi kwa sababu tumejipanga kufanya kazi pia.” Miraji ambaye ni mchezaji wa zamani wa Simba amesema, mpira unachezwa uwanjani kwa dakika 90.
Hakuna maoni:
Chapisha Maoni